'Killer' sa nursing student 'sikop

CEBU, Philippines - Sa katapusan nasikop nag sa kapulisan ang wanted nga tulisan kinsa maoy nitulis patay sa usa ka graduating nga nursing niadtong Hunyo 21 ning tuiga diha may Victoria Village barangay Tabunok dakbayan sa Talisay.

Si Francisco Bacaresas, 27, Jr. alias “Junjun Abella” taga Manguilamon Jaclupan dakbayan sa Talisay, nasikop sa hiniusang operation nila ni Supt. Rodolfo Albotra sa Provincial Intelligence Branch (PIB) ug sa Provincial Anti-Illegal Drugs Special Operations Task Force (PAIDSOTF) sa gipuy-an niini sa sitio Kamansi sa barangay Pajo dakbayan sa Lapulapu kagahapon sa alas 11 sa buntag.

Ang grupo nilang Albotra sa PIB-PAIDSOTF misikop kang Bacaresas pinasikad sa warrant of arrest nga gi-isyu ni Judge Oligario Sarmiento Jr. sa Regional Trial Court (RTC 24), gumikan sa kasong robbery with homicide human niini gipusil ug napatay ang biktimang si Dennis Kristoffer Bago, 20, scholar sa Cebu Normal University (CNU) graduating sa kursong nursing.

Ang PIB-PAIDSOTF upat ka bulang nagsige’g pangita sa akusadong si Bacaresas ug dihang ilang nakumpirmar nga diha ra nagtago-tago sa Lapulapu gipahigayon dayon ang operation hinungdan sa pagkasikop niini.

Ang amahan ug igsuon sa biktima wala makapugong sa ilang kaugalingon dihang ilang naabtan ang suspetsado sa buhatan sa PIB ug gipuli-pulihan og sukmag, patid ang akusado atubangan sa kapulisan.

Ang amahan nga si Dennis Bago nga gikahinabi sa mga tigbalita nagkanayon nga sa katapusan nakab-ot na sa ilang pamilya ang hustisya nga ilang gipaabot ingon man sa ilang mga kaliwat ug mga higala.

Gikalipay niining naatol pa sa kalag-kalag ang pagkasikop sa akusadong si Bacaresas diin iyang gipadayag nga magmalipayan na unya ang kalag sa iyang anak nga si Kristoffer.

“Kun mahimo pa gani kunis-kunison nako na siya kulang pang ibayad ang iyang kinabuhi sa pagpatay niya sa akong anak dili na gyud to mabalik ang kinabuhi sa akong anak,” sumala pa sa amahan nga si Dennis.

Ang akusado nga si Bacaresas nga gikahinabi sa mga tigbalita hugtanong nanghimakak sa akusasyon tungod kay wa siya’y kalambigitan niini apan ang iyang nahibaw-an nga si Jessie Largo maoy nipusil patay sa biktima uban kang Jessler Antig kinsa nangadakpan sa kapulisan sa Talisay.

Didto lang siya sa ilang gipuy-an sa Lapulapu atol sa krimen nga nagbantay sa iyang mga anak ug nahibulong nalang siya dihang gipahibalo sa iyang inahan nga gilambigit sa kasong pagtulis.

Gumikan sa iyang kahadlok nagtago-tago siya sa dakbayan sa Lapulapu uban sa iyang asawa ug tulo ka mga gagmay’ng anak, hinuon ni-angkon siya nga nabilanggo na kaniadto sa kasong robbery.

Si Sr. Supt. Jesus Gaquing, pangulo sa kapulisan sa lalawigan   nagkanayon nga sulbad na ang kaso human nadakpan ang triggerman nga si Bacaresas, gani mapasalamaton siya sa PIB ug PAIDSOTF nga maoy nakasikop niini.

Gipadayag niini nga gumikan sa maayong dagan sa imbestigasyon sa kapulisan sa dakbayan sa Talisay natumbok gyud ang suspetsado, ingon man gitumbok usab kini sa mga kaubang tulisan, sa mga testigos.

Nasayran nga ang biktimang si Bago gikan nisimba diha sa ilang lugar nga naglakaw paingon sa ilang panimalay apan sa kalit lang nibabag ang mga tulisan ug gitulis pinaagi sa pagkuha sa iyang kuwarta ug cellphone ug gipusil. (Guam Logroño)    (BANATNEWS)