CEBU, Philippines - Nabuslot ang agtang ug milapos ang bala sa luyong bahin sa ulo sa usa ka ulitawo human gipusil sa usa ka barangay tanod mga alas 4:45 sa kaadlawon kagahapong adlawa diha sa may New Imus Road barangay Lorega San Miguel ning dakbayan sa Sugbu.
Nagkulob na daplin sa karsada nga naabtan sa kapulisan ang patay’ng lawas sa biktimang si Eric Fuentes, 25, taga Purok 5 barangay Camputhaw, samtang ang gitumbok mao ang barangay tanod sa Lorega San Miguel nga si Bryan Mabaga.
Sa imbestigasyon nila ni SPO4 Geoffrey Gutual sa Homicide Section sa Cebu City Police Office ug mga kaubanan ang igsuon sa biktima nga si Cleo Fuentes mibutyag nga nagkuyog sila sa iyang maguwang ug mga higala nianang tungura.
Dihang kalit lang mibutho ang suspetsado uban sa wala mailhing lalaki gikan milingkod sa center island ug miduol kanila dayong mition og armas si Mabaga ngadto sa biktima.
Sa kahadlok nagkatibuwaag panagan ang ilang grupo apan uwahi nang nakadagan ang biktima sanglit gipusil kini dayon diha sa agtang, human niini daling miikyas ang duha sa dapit.
Dihang naabot ang kapulisan sa lugar nakuha sa crime scene ang usa ka “toy gun” ingon man lima ka paketeng sbahu diha sa bulsa sa biktima.
Apan ang mga kabanay ni-alegar nga planted kadtong toy gun nga nakit-an sa lugar tungod kay dunay nakakitang human gipusil sa suspetsado ang biktima gikatahong giitsahan kini og toy gun. (Guam Logroño) (BANATNEWS)