Amahan ug anak gipatay sa Balamban

CEBU, Philippines - Amahan ug anak gipamusil patay sulod sa ilang panimalay sa ilang silingan niadtong Domingo sa alas-7 sa gabii sa sitio Riverside barangay Singsing lungsod sa Balamban.

Ang namatay giila sa kapulisan nga si Cesario Cadampog Herbito, 46, ug anak niining si Billy Joy ,19, samtang ang gitumbok nga suspetsado ang ilang silingan nga si Achilles Bagat, 36, kinsa daling miikyas.

Sa imbestigasyon sa kapulisan sa Balamban ang wala magpailang anak nga babaye mibutyag nga diha sila sa sulod sa ilang panimalay dihang kalit nisulod ang suspetsado nga way pananghid sa ilang balay.

Kini hinungdan nga gisita kini ni Billy Joy apan kalit lang mibunot og wala matinong armas ang suspek ug gipusil kini sa dughan, daling migawas ang suspek apan gigukod kini ni Cesario apan gipusil usab kini sa suspek diha sa agtang.

Ang suspetsado wala na maabti sa kapulisan, personal grudge ang gitumbok sa kapulisan nga motibo sa pagpamusil. (BANATNEWS)