CEBU, Philippines - Dili una mopadala og Certificate of Tax Delinquency ang kagamhanan sa dakbayan sa Sugbu ngadto sa Cebu Doctors’ University (CDU) ug Cebu Doctors’ Hospital (CDH) bisan pa man kung napupos na ang gihatag nga tagal alang sa pagpabayad sa buluhisan pinaagi sa gipadalang final demand letter.
Kung mahatagan og certificate of tax delinquency ang usa ka establisamento mosunod usab dayon niini ang warrant of levy nga magpugong na sa tag-iya paggamit sa ilang propiyedad.
Ang CDU ug CDH gikatahong dunay kapin sa usa ka gatos ka milyon ka pesos nga wala mabayring buhis sa dakbayan.
Matud pa ni City Treasurer Ofelia Oliva nga dili una sila mohimo sa sunod nga lakang tungod kay dunay laing sabot-sabot tali sa siyudad ug sa mga proprietary schools ug hospitals.
Kini human usab mopadayag og kaandam ang University of Cebu pinaagi sa presidente niini nga si Atty. Agusto Go pagbayad sa ilang obligasyon.
Ang tag-iya sa UC mipasalig ngadto sa dakbayan nga iyang makombinsir ang ubang tag-iya sa mga tambalanan ug tunghaan pagbayad sa ilang buluhisan.
Nagkanayon si Oliva nga ila unang ipatuman ang status quo samtang magpaabot sa kalamboan sa nahisgutang sabot-sabot. Nasayran nga niuyon na si Mayor Tomas Osmeña nga wagtangon ang bayranang buhis sa mga proprietary schools ug hospital sa siyudad gikan sa tuig 2006 paubos.
Kini nagpasabot nga ang bayran sa mga tunghaan ug tambalanan nga 75 sa usa ka porsyiento sa gross income niini matag tuig mao na lang ang gikan sa 2007 pataas.
Lakip sa UC, CDU, ug CDH nga utangan sa dakbayan nga mosumada og kapin sa P335 milyones mao ang Cebu North General Hospital (CNGH), Cebu Institute of Technology (CIT), Southwestern University (SWU), Sacred Heart Hospital (SHH) ug Velez General Hospital (VGH).
Nanghinaot si Oliva nga mamahimong positibo ang resulta sa sabot-sabot tungod kay giingong dili usab nila gusto nga mosakmit og mga propiyedad.- Elly Bolonos (BANAT NEWS)