Di tanang mayor suporta ni 'Gibo'

CEBU, Philippines - Giklaro sa kahugpungan sa Municipal Mayors League sa probinsiya sa Sugbo nga dili tanang mga mayor sa Sugbo ang mopaluyo sa kandidatura sa kandidatura ni Gilberto ‘Gibo’ Teodoro nga maoy official candidate sa ruling party Lakas-Kampi CMD.

Mao kini giluwatang katin-awan sa presidente sa League of Municipal Mayors sa Sugbo nga si Dumanjug Mayor Cesar Baricuatro agi og reaksyon sa nigawas nga report may labot sa pagpirma og manifesto sa 26 ka mga mayor sa Sugbo nga mipadayag sa ilang suporta sa kandidatura ni Teodoro.

Si Baricuatro miklaro hinuon nga ang mao niyang pamahayag iyaha lang kining baruganan ug walay labot ang liga diin siya mao karun ang kasamtangang nagdumala.

Walay lipod-lipod nga gipadayag ni Baricuatro ang iyang pagsuporta sa kandidatura ni Senador Manny Villar sa Nationalista Party nga gitakda usab nga mopahibawo sa opisyal nga pagpapili niini pagka presidente sa 2010 election.

Gidugang ni Baricuatro nga determinado na usab siya nga magpapili pagka kongresista sa segundo distrito sa lalawigan sa Sugbo ubos sa partido ni Villar atbang ni incumbent congressman Pablo Garcia nga amahan ni Gov. Gwendolyn Garcia.

Si Baricuatro anaa na sa ikatulo ug katapusang termino pagkamayor sa Dumanjug ug karon mituboy sa iyang anak nga si Ylaya barangay captain Cris Baricuatro nga maoy mohulip niya pagpapili pagkamayor sa ilang lungsod aron mopadayon sa wala pa niya mangahumang proyekto.

Gidugang ni Baricuatro nga siya ug pipila ka mga kaubanang mayor sa Sugbo nagpaabot nalang sa pormal announcement ni Villar karung sunod semana.– BANAT NEWS