19 anyos gipusil samdan sa dughan kritikal ang kahimtang

CEBU, Philippines - Nasabak sa dughan ang 19 anyos nga gipusil sa wala hiilhing kriminal didto sa Purok-5, barangay Nangka, lungsod sa Consolacion niadtong Biyernes sa alas 5:10 sa buntag.

Ang biktima mao si Jesser Roma, 19, ulitawo, nga taga barangay Nangka, samtang ang mipusil kaniya usa sa duha ka tawong nagsakay og motorsiklo.

Si PO1 Winston Magdadaro sa Consolacion Police Station mibutyag sa Banat News nga ang biktima kauban sa pito niya ka mga barkada naglakaw sa karsada paingon sa ilang balay gikan sa inom nunot sa kasaulogan sa piyesta sa ilang lugar.

Apan samtang alegre kaayo sa ilang lakaw, pag-abot nila sa nahisgutang lugar kalit lang gihunongan sila sa usa ka motorsiklo ug dihadiha ang angkas niini maoy milanit sa gitangkil niyang armas de fuego ug walay daghang langas gitirohan dayon ang biktima.

Maayong pagkaigo sa sentro sa dughan sa biktima ug dihang nalup-og na kini sa karsada, mibiya dayon ang mga kriminal sakay sa ilang motorsiklo.

Ang biktima gihatod dayon ngadto sa Everseley Hospital sa Jagobiao, siyudad sa Mandaue, apan gibalhin  kini ngadto sa dakbayan sa Sugbo.

Padayon pang gipangita sa kapolisan ang mga kriminal. – BANAT NEWS