CEBU, Philippines - Samdan ang duha ka tawo dihang gipamusil kini sa ginganlan og Zapart didto sa sitio Fatima-Englis,V. Rama Avenue, barangay Guadalupe ning dakbayan sa Sugbo kagahapon pasado alas 4:00 sa kaadlawon.
Ang mga biktima mao sila si Alvin Gallardo, 18, ug John Paul II Gozon, 18, nga pulos taga Fatima, samtang ang suspetsado nailhan lang sa ngalang Zapart uban sa duha ka kauban niini.
Matud pa sa duha ka biktima nga mosakay na unta sila og taxi pauli sa ilang balay dihang giduol sila sa suspetsado ug sa walay daghang pangutana gipamusil sila niini.
Si Gallardo naigo sa tiyan, samtang si Gozon naigo sa tuo nga bahin sa iyang tiil.
Si SPO4 Alex Dacua sa Homicide Section sa Cebu City Police Office mibutyag sa Banat News nga panagdumot ang hinungdan sa maong pagpamusil.
Gihatod dayon ngadto sa Cebu City Medical Center ang mga biktima samtang ang miluthang kanila gipangita pa karon sa mga otoridad. – BANAT NEWS