Van nga gigamit pagpanulis nasakmit

CEBU, Philippines - Nasakmit na sa kapolisan ang usa ka puting Hi-Ace Grandia van nga gidudahang maoy gigamit sa pagpanulis sa mga tulisan dinhi sa dakbayan niadtong hapon sa milabay'ng adlaw diha sa dalan F. Ramos St. sa barangay Cogon-Ramos.

Ang mga sakop sa Special Operation Group sa Theft and Robbery Section sa syudad sa Sugbo mipahigayon og hot pursuit operation human ang mga tulisan nga magsakay og van nakabiktima na usab sa miaging buntag.

Usa ka Catherine Alquisa, nga naglakaw diha sa dalan F. Ramos dihang gihunongan sa maong van ug gibunlot sa iyang mga kamot ang iyang bag nga adunay mga sulod nga cellphone ug dokumento.

Si Alquisa misuway pa unta og pugong sa iyang bag natumba kini ug nakaangkon og mga pangos sa bukton apan nakuha niya ang plaka sa van nga TFE-678.

Human niini daling misumbong si Alquisa sa kapolisan, ang van nasigpatang giabandonar na diha sa Jay K. See pay parking lot sa dalan F. Ramos sa samang barangay.

Ang mga polis misuway pa og paabot sa mga sakay niini sa pamasin nga mamalik apan naabtan nalang sila og hapon wala nay misakay og balik niini hinungdan nga ilaha nalang kining gidala sa ilang buhatan.

Nakuha diha sa sulod ang itom nga bag nga adunay ID sa eskuylahan nga gipanag-iya ni Alquisa, usa ka kalibre.38 rebolber nga adunay upat ka buhing bala, usa ka kabhang sa nahisgutang armas ug usa ka improvised plate number nga YCX-401. Sa pakighinabi sa Banat News kang Sr. Insp. Michael Anthony Bastes sa Theft and Robbery Section kini mibutyag nga ang van gi-karnap diha sa display center sa Toyota sa North Reclamation Area sa Mandaue niadtong milabay'ng bulan sa Agosto. Nasuta usab nga hinimo-himo ra ang plaka niini. Sa pakighinabi usab sa taga Banat News sa Vehicle Control Supervisor sa Toyota nga si Absalon Vergara mikumpirmar nga mao kini ang P1.4 million nga van nga gi-test drive sa nagpailang buyer apan gipasutoy na kini ug wala na mobalik. – BANAT NEWS