Margot, Ronald mikompleto sa BOPK lineup

CEBU, Philippines - Kompleto na ang lineup sa Bando Osmeña Pundok Kauswagan (BOPK) sa habagatang distrito sa siyudad sa Sugbu sa umaabot nga eleksyon.

Kini human ibutyag ni Mayor Tomas Osmeña ang mopuno sa listahan sa ilang mga kandidato pagka-konsehal sa south district ug kini mao ang iyang asawang si Margot Osmeña ingon man ang anak ni kongresista Tony Cuenco nga si Ronald Cuenco.

Sila si Margot ug Ronald mao unya'y mohulip sa biyaang posisyon nila ni konsehal Arsenio Pacaña ug konsehal Gerardo Carillo nga pulos anaa na sa ikatulo ug katapusang termino.

Una nang gipahibawo ni Osmeña nga sila si Jaybee Carillo (asawa ni konsehal Carillo) ug ABC president Eugenio Faelnar maoy muhulip sa duha ka konsehal apan gumikan sa mga intriga nahukman niyang sila si Margot ug Ronald nalang ang ibutang sa ilang lineup.

Dugang niini, nakadesidir usab ang mayor pagkuha ni Ronald human usab makahukom ang anak sa kongresista nga dili magpapili sa umaabot nga eleksyon sa South District.

Samtang sa iyang pagbutang kang Margot gihimo sa mayor aron dili makalingkod si kanhi konsehal Joy Pesquera sa City Council.

Subling gipadayag ni Osmeña nga siya interesado nga magpapili pagka-kongresista sa South District nga maoy nikompleto sa ilang ticket sa habagatang distrito.

Ang atimanon na lang karon sa mayor ang mga kandidato usab sa north district nga iyang gihulagway nga labihan usab ka gubot. Kini tungod kay giingong dunay daghan usab nga gustong magpapili gawas sa mga pangalan unang nanggawas sa radyo, telebisyon ug pamantalaan.

Apan gitataw ni Osmeña nga kini mahusay ra sa dili pa moabot ang deadline pagduso sa certificate of candidacy sa sunod buwan. – BANAT NEWS