Walay pang-salvage: Centcom

CEBU, Philippines - Hugtanong gipanghimakak sa kadagkuan sa Central Command ang pasangil sa mga militanteng pundok dinhi sa Sugbo nga gipang-salvage sa militar ang duha ka mga sakop sa rebeldeng New People's Army (NPA) nga napatay sa engkwentro didto sa Negros Oriental.

Ang pangulo sa CentCom, Lt. Gen. Isagani Cachuela, nagkanayon atol sa pag-atubang sa mga sakop sa tigbalita kagahapong adlawa diha sa iyang buhatan nga ang napatay didto sa Zamboangita nga si Rodel Carpentero nga taga dakbayan sa Sugbo ug lider sa NPA nga si Leofrie Vallejra didto sa Guilhulngan wala gi-salvage sa militar.

Si Cachuela mipasabot nga dili kini polisiya sa militar nga ilang patyon ang ilang mga dinakpang mga rebelde sanglit ilang gitahod ang tawhanong katungod ingon man misunod sila sa lagda sa International Humanitarian Law.

Sumala pa niini nga kabahin lamang sa propaganda sa mga walhong pundok nga ilang ipagawas nga nalapas sa militar ang tawhanong katungod sa usa ka tawo sa ingon mogawas nga bati ang paglantaw sa publiko ngadto kanila.

Apan sa mga propagandang gihimo sa mga rebelde wala mosaler sanglit napamatud-an na sa makadaghang higayon nga walay nahimong pagpangabuso ang militar.

Dili usab sila makatugot sa militar nga mag-abusar sa tawhanong katungod sa ilang mga sakop ug kun duna may nakahimo niini dili nila palabyon ang imbestigasyon ingon man pagsilot sa ilang mga sakop.

Hinuon alang kaniya ang ilang buhatan sa Central Command bukas sa tanang higayon sa pag-atubang sa bisan unsang imbestigasyon kun ugaling ang mga militante moduso og reklamo ngadto sa Commission on Human Rights (CHR).

Nasayran nga usa ang patay ug tulo ka mga tinun-an dinhi sa Sugbo ang nadakpan atol sa unang engkwentro sa militar ug NPA didto sa Zamboangita samtang usa ang patay, duha nadakpan didto sa Guihulngan City, Negros Oriental. – BANAT NEWS