Gubot sa Lahug

CEBU, Philippines - Gipaabot nga dunay dakong gubot nga mahitabo diha sa barangay Lahug kun tinud-on ni Cebu City Mayor Tomas Osmeña ang iyang bahad nga ipatangtang ang tanang mga basketball board sa siyudad nga gitaod sa mga basketball goal nga gipanag-iya sa city government.

Nasayran nga sila si Kapitan Mary Ann delos Santos sa barangay Lahug ug sportsman Jonathan Guardo nanghatag usab og mga basketball board sa kabarangayan.

Nagplano si Osmeña nga unahon pagpasuroy sa iyang welder ang barangay Lahug aron pagtino kun asa niini nga goal ang gipanag-iya sa siyudad.

Matud sa mayor nga ang pag-ilis og mga basketball board sa mga goal nga gipanag-iya sa dakbayan usa ka immoral ug illegal nga buhat.

“That is the lowest level, that’s a cheap, indecent, immoral and illegal way of doing things…so, we’re going to remove all of their boards unless the goal is owned by them,”sumala ni Osmeña.

Apan si delos Santos miingon nga angayang isulti ni Osmeña ang iyang gipamulong ngadto kang education consultant Joy Augustus Young.

Ang consultant giakusahan sa kapitan nga maoy misugo sa pakyas nga pagpatangtang sa basketball board sa sitio Golden Valley, Lahug.

Gitataw usab ni delos Santos nga wala usab siya mahadlok sa bahad sa mayor uban sa pagpadayag nga siya andam manalipod sa iyang barangay.

“Nganong ipatangtang man niya, he can not invade my turf, this is barangay Lahug and we are independent and autonomous ... so, I will not allow that,” matud ni delos Santos.

Sa susamang kalambuan, gihagit usab ni Osmeña si Guardo nga itudlo niini ang gipanghambog nga usa ka libo ka mga basketball board nga gihatag ngadto sa kabarangayan.

Alang sa mayor, dili katuohan ang gipasigarbo ni Guardo tungod kay wala kaabot og usa ka libo ka basketball goal ang gipahimo sa dakbayan ngadto sa south district.

Gani miingon si Osmeña nga mokapin lang sa 50 ka basketball board ang ilang na-release ngadto sa habagatang distrito sa siyudad.

Apan ang sportsman miinsister nga tinuod ang iyang gisulti ug andam siya nga mopamatuod niini ngadto sa mayor. “Ako sab siyang hagiton nga kung pwede magkuyog mi aron akong itudlo niya kung asa na nga mga dapita kay it’s all over the city,” nagkanayon si Guardo.

Nagdumili hinuon pagtubag si Guardo sa ubang pasangil ni Osmeña labot sa iyang negosyo ug ang tumong niini pagpapili pagka-kongresista sa south district. – BANAT NEWS