Posporo miugdaw sa balay

CEBU, Philippines - Gumikan sa posporo ug uling naugdaw ang duha ka balay ug duha ka motorsiklo sa managlahing sunog nga nahitabo sa mga dakbayan sa Talisay ug Sugbo kagahapon sa buntag.

Ang unang sunog nahitabo sa Seguera Compound, sitio Uldog, barangay Poblacion, dakbayan sa Talisay kagahapon sa alas 5:45 sa buntag, ug nianang pagka-alas 8:00 sa kabuntagon misunod usab pag-ulbo ang laing sunog didto sa President Roxas Street, sa barangay Mabolo, dakbayan sa Sugbo.

Ang balay ug duha ka motorsiklo nga gilamoy sa kayo didto sa Talisay , gipanag-iya sa magtiayong Bernardo ug Adriana Dela Torre sa Seguera Compound sa sitio Uldog, samtang ang balay nga naugdaw didto sa Mabolo iya kang Rose Uybesano.

Si SFO1 Cesar Dela Cerna sa Talisay City Fire Station mibutyag sa Banat News nga mokabat og P250 mil ang kantidad sa naugdaw nga balay ug motorsiklo sa Talisay, samtang P20 mil usab ang sa Mabolo ug walay gikatahong naangol o namatay sa maong mga hitabo.

Si Dela Cerna nagkanayon nga base sa ilang nahipos nga report ang kayo nagsugod sa kwarto sa balay diin giingong ang 4-anyos nga apo sa magtiayong Dela Torre nagduwa og pusporo.

Ang bata giingong daling migawas sa kwarto ug misangpit sa apohan niyang lalaki ug sa pagsusi pa sa apohan niini miulbo na ang kayo hinungdan nga nanawag na lang sila og bombero.

Si Dela Cerna midugang nga ang apohan sa bata giingong nag-andam og pusporo nga idagkot og kandila tungod sa pagpunay og brown-out sa ilang lugar.

Samtang ang mga bombero sa Mabolo nagkanayon nga ang uling sa abohan sa balay ni Uybesano nabiyaan sa bayaw niini nga si Rose kay nag-atiman sa ilang karenderia ug gumikan sa kusog nga hangin nanglupad ang uling ug didto manugpa sa mga sunogunong mga gaang materyales sa balay ug sa pagsiga niini mikaylap dayon ang kayo ug sa pag-abot sa mga bombero abo nalay ilang nasaksihan. - Brenda D. Batuto ug Lesley Caminade (BANAT NEWS)