Granada di pa makalingkod

CEBU, Philippines - Ang Department of Interior and Local Government (DILG) mitumbok nga nagpaabot na lamang sila og kamanduan gikan sa Comelec aron hingpit nilang pabalikon sa paglingkod si Mayor Demitrio Granada sa pagkamayor sa lungsod sa Tudela.

 Matud pa ni DILG-7 legal officer,   Danilo Almendras nga ang ilang buhatan wala pa gyud makadawat og kamanduan gikan sa Comelec En Banc alang sa pagpalingkod kang Mayor Granada.

 Kini bisan pa man una nang mipagawas og disisyon ang Comelec En Banc nga ang tinuoray nga nakadaug sa pagkamayor sa maong lungsod mao si Granada ug dili si Mayor Rogelio Baquerfo.

 Matud pa ni Almendras nga wala sila’y mahimo sa pagpunay og hangyo ni Granada nga pakanaugon na si Mayor Baquerfo. Kini ilabina nga ang abogado ni Mayor Baquerfo nga si Atty. Noel Archival miduso og motion for reconsideration sa Comelec En Banc aron pag-usab sa unang disisyon nga nagpabor kang Mayor Granada.

 Hinuon mipasalig si Almendras nga ang buhatan sa DILG mupalingkod dayon ni Mayor Granada sa munisipyo sa lungsod sa Tudela sa higayon nga makadawat na sila og kamanduan gikan sa Comelec.

 Dugang pa niya nga ang DILG andam nga mogamit sa puwersa sa kapolisan sa probinsiya kun magdumili sa pagkanaug si Mayor Baquerfo sa iyang puwesto. - Chester Abadilla (BANAT NEWS)