Ulo gidakdakan bato, napiyapi

CEBU, Philippines - Patay nang nakit-an nga napiyapi ang ulo sa usa ka habal-habal drayber human gidakdakan og dakong bato daplin sa dalan sa barangay Danlag, lungsod sa Consolacion niadtong Lunes sa ala una sa sayong kaadlawon.

Ang biktima mao si Joselito Alibio Alfalla, 27, ulitawo apan dunay kapuyo ug molupyo sa barangay Tolotolo sakop sa maong lungsod.

Matud ni SPO1 Romulo Sasing sa Consolacion Police Station nga sa dihang nahinabi sa Banat News nga ang biktima nakit-an sa mga tawo nga nagbuy-od daplin sa dalan nga nagkadugo ang ulo hinungdan nga gi-report dayon sa kapolisan.

Sa pagresponde sa mga polis, nasuta nga patay na ang biktima ug napiyapi ang ulo niini nga gituohasng gidakdakan og dakong bato sa wala pa mailhing mamumuno. Gidudahan nga giatngan nang daan ang biktima sa maong lugar ug pagkahuman gipatay gamit ang bato nga gidakdak sa ulo niini ug pagkahuman gibiyaan lang usab dayon sa nagpatay. Nakuha sa kapolisan ang motorsiklo sa gituohang iya sa mamumuno nga kasamtangang gi-impound nunot sa nagpadayong imbestigasyon.

Gihulagway ni SPO1 Sasing nga ang biktima usa ka buotan ug walay kontra subay sa iyang nahibaw-an ug nahibulong siya nganong gipatay kini.

Apil sa anggulo nga gisubay sa nagpadayong imbestigasyon ang posibilidad nga may kalambigitan sa love triangle ang motibo sa krimen o ba kaha personal nga kontra. – BANAT NEWS