Rebeldeng napatay ilhan na

CEBU, Philippines - Nailhan na sa militar ang rebelde nga napatay ingon man duha niini ka kaubang nadakpan human sa engkwentro niadtong Domingo sa kaadlawon didto sa Sitio Moog, barangay Planas, Guihulngan City, Negros Oriental.

Si 1Lt Mark Posadas, civil military operations officer sa 3rd Infantry Division, 11th Infantry Battalion sa Philippine Army nga nakabase sa Negros Oriental, miila sa namatay nga rebelde nga si Leofre Vallejara alyas Bokyo, 30, taga Bacolod ug giilang intelligence officer sa mga rebeldeng New People’s Army.

Samtang ang mga nadakpan mao sila si Junrey Cuevas, 19, nakuhaan og kagamitan sa mga rebelde ug Monico Butas alias Dado/Sario, 62, taga Guihulngan nga nakuhaan og kalibre .45 pistola uban sa mga bala, backpack nga dunay mga subersibong mga dokumento.

Si 1Lt Posadas nagkanayon nga ang mga sakop sa 11th IB nagpatrolya sa dihang nakadawat sila og report nga adunay maabot nga mga sakop sa rebelde sa lugar.

Sumala pa niini nga samtang ang grupo nila ni 1Lt Danilo Mutoc nagpaduol sa usa ka panimalay nga giabandonar, kalit lang gipa-ulanan og mga bala ang mga sundalo hinungdan nga nahitabo ang sinukliay sa mga bala.

Gikataho nga 10 ka mga rebelde ang didto sa sulod sa panimalay.

Atol sa kaguliyang sa dihang nagtibulaag og panagan ang mga rebelde, ilang nakita nga dunay mga amazona nga kuyog niini ingon man mga samaran nga gikonpirmar usab sa mga residente.

Gituohan sa militar nga didto sa lugar ang lider sa mga rebelde nga si Frank Fernandez apan naka-ipsot lamang tungod kay didto man usab ang napatay nga intelligence officer.

Atol sa interogasyon sa mga nadakpan, ang 19-anyos nga si Cuevas miangkon nga apil siya sa miatake sa police station sa lungsod sa La Libertad, Negros Oriental niadtong Nobiyembre 2, 2008 diin siya naangol.

Ang duha ka dinakpan gi-turnover sa kapolisan ug pasakaan og kasong rebellion. – BANAT NEWS