40 ka amang gitudloan og panginabuhi

CEBU, Philippines -  Mokabat sa 40 ka mga batan-on nga mga amang nga nagtungha sa Mandaue City Comprehensive Impaired Special Education (MCCI-SPED) ang gitudloan usab og trabaho nga mahimo nilang panginabuhian human sa ilang pagtungha sa high school sa maong tulonghaan.

Kini nahimo pinaagi sa pagpakiglambigit sa (MCCI-SPED) ngadto sa Quota Club of Mandaue ug Technical Education Skills and Development Administration (TESDA) nga maoy mobansay-bansay kanila sa trabaho nga buot nilang makat-onan.

Milampos kining tanan dihang gisuportahan sila sa buhatan ni 6th District Representative Nerissa Soon-Ruiz kinsa migahin og salapi gikan sa iyang Priority Development Assistance Fund.

Ang negosyante nga si Mrs. Marlyn Villanueva nga kanhi presidente sa Quota Club of Mandaue nga maoy tag-iya sa Grand Royal Spa sa Ibabao Estancia sa maong dakbayan mitanyag usab sa pagpatrabaho sa maong mga amang.

Sa pagpakighinabi sa Banat News kang TESDA Assistant Regional Director Buenafe Sta. Rita iyang gipadayag nga ang ilang buhatan maoy mohimo sa mga pagbansay-bansay alang sa pagkat-on og trabaho sa maong mga amang nga tinun-an.

Dugang pa niya nga actual ang ilang itudlo nga trabaho nga pagaubanan usab sa mga magtutudlo sa sign language sa MCCI-SPED kinsa maoy mopasabot sa itudlo nilang trabaho pinaagi lang sa sinyas sa kamot.

Si Mrs. Estrilleta Wong nga maoy presidente sa Quota Club of Mandaue nga nahinabi sa Banat News miingon nga ilang gitabangan ang mga amang nga tinun-an sa MCCI-SPED sa tinguha nga makabaton usab sila og tingusbawan sa kinabuhi taliwala sa kakulian sa ilang panglawas.

Si Kongresista Soon-Ruiz mibutyag sa Banat News nga ang maong mga tinun-an nga mohimo sa ilang on the job training sa Grand Royal Spa magdawat og P30 nga allowance nga iyang gikuha gikan sa P5 milyones niyang gahin sa TESDA alang sa gipatuman niining mga programa. - Romeo T. Limpangog (BANAT NEWS)