CEBU, Philippines - Mikabat na sa 300 ka mga binilango sa Lapulapu City jail ang nakaparehistro sa COMELEC Lapulapu alang sa umaabot nga piniliay sa tuig 2010.
Kini ang gikumpirmar ni Lapulapu City COMELEC Officer Atty. Ferdinand Gujilde sa pakighinabi sa Banat News kagahapon kinsa nagkanayon nga gihatagan gayud nila og dakong pagtagad ang maong mga matang sa tawo tungod sa kasugoan sa Comelec.
Base sa usa ka COMELEC resolution kini nagmando nga kinahanglang unahon ug hatagan og prioridad sa pagparehistro ang mga binilanggo, sakop sa militar, senior citizen, may apan sa panglawas ug mga nagsabak nga mga botante aron makahigayon sila sa pagbotar sa umaabot nga election.
Kini maoy hinungdan nga nakaabot na sa 300 ang mga nakaparehistrong piniriso karon matud pa ni Gujilde .
Sa laing bahin gumikan sa nagkaduol na nga deadline sa rehistrasyon nagsugwak kagahapon ang nagparehistro sa buhatan sa Comelec Lapulapu ug gibanabana ni Atty. Gujilde nga mikapin sa usa ka libo ka tawo ang naghuot sa taas kaayong linya sa Lapulapu City gym.
Nasayran sa Banat News nga ang uban niini kagahapon pa sa alas 12:00 sa lapas sa tungang gabii naglinya aron sa pagkuha og porma sa buhatan sa COMELEC.
Busa nagkanayon si Gujilde nga ang katawhan ra gihapon ang mabasol niining tanan kay kun nagparehistro pa sila og sayo dili unta sila mahasol ning panahona. - Bong Soriano (BANAT NEWS)