CEBU, Philippines - Pakigtagboan ni Cebu City Vice Mayor Michael Rama ang kapulisan sa dakbayan ugmang adlawa aron susihon ang gihimo niining pagpangandam alang sa umaabot nga kalag-kalag.
Ang bise mayor nga maoy chairman sa Police Coordinating and Advisory Council (PCAC) buot mutino sa security plan sa kapulisan ilabi na diha sa mga sam-ang.
Nasayran nga ang siyudad dunay kapin sa napulo ka publiko ug pribadong sementeryo sa nagkalain-laing urban barangay sa dakbayan.
Kini gipaabot nga hugpaan sa bagang duot sa katawhan atol sa kalag-kalag nga moduaw sa ilang mga mahal sa kinabuhi nga mitaliwan na ngadto sa laing kalibutan.
Gusto sa bise mayor nga ipadangat ngadto sa kapulisan ang pahimangno nga gikan ni Mayor Tomas Osmeña bahin sa pagmintenar sa kahusay ug kalinaw sa siyudad.
“To be reminded of that Mayor Tom has always been stressing that don’t think to cover all and then not being able to cover at all, be more specific and observant,” sumala ni Rama.
Lakip sa ipatawag sa bise mayor mao ang mga barangay officials ingon man ang hepe sa ilang mga tanod, Citom personnel, ug mga street traders.
“So that we can have all of these properly discussed and they would be able to be aware of what’s going to be expected,” sumala ni Rama.
Buot sa bise mayor nga dunay hiniusang kawsa nga matigayon pagmintenar sa kahusay ug kalinaw sa dakbayan ilabi na atol sa todos los santos ug sa adlaw sa mga kalag.
Kini ubos usab sa pilosopiya nga Barangayan, Bayanihan ug Bulunterismo nga kanunay’ng ipahinumdom ni Rama sa matag kalihukan. - Elly Bolonos (BANAT NEWS)