LRT hingpit gibasura

CEBU, Philippines - Hingpit nang gibasura sa administrasyon ni Cebu City Mayor Tomas Osmeña ang gisugyot nga Light Rail Transit (LRT) system dinhi sa Metro Cebu.

Ang mayor mipadayag nga mahimo lang ikunsiderar ang LRT kung mahuman na ang pagtuon nga gihimo alang sa Bus Rapid Transit (BRT).

Una nang gipadayag ni City Planning Officer Nigel Paul Villarete nga ang pagtuon sa BRT nga gisugdan niadtong miaging semana, molanat pa og onse ka buwan. Ubay-ubay nga rason ang gisaysay ni Osmeña sa iyang pagbasura sa nahisgutang proposal gawas sa gihimong feasibility study alang sa BRT.

Nagduda ang mayor sa pagdali-dali sa ahensyang hingtungdan nga mapatuman ang maong proyekto dinhi sa Metro Cebu.

“When I heard there’s a deadline, October 24, that means the money has to come out before election time, that’s what I’m thinking,” sumala pa ni Osmeña.

Nabalaka usab ang mayor nga masusama ang LRT project sa gipangtaud nga mga lampposts dinhi sa Metro Cebu nga napuno sa kontrobersiya.

Subay niini giawhag ni Osmeña ang mga Sugbuanon nga magpakisusi sa gisugyot nga LRT project tungod kay ang pagtuon sa BRT molanat pa og onse ka buwan.

Ang mayor gipaabot nga mopadala og suwat ngadto sa National Economic and Development Authority (NEDA) ingon man sa Regional Development Council (RDC-7) nga magbasura sa proposal pagbutang og LRT sa Sugbu.

Gusto usab si Osmeña nga masayod ang maong mga buhatan ingon man sa ubang ahensya sa kagamhanan nga dili makaipsot kaniya ang mga palusot.

“I want to send a message to NEDA and to anybody else, it’s rejected because they make palusot, I’m not in favor with it,” matud pa ni Osmeña.

Gitataw hinuon sa mayor nga mahimong ikonsiderar ang proposed LRT sa sunod nga mayor sa siyudad kini usab matumong inig kahuman usab sa feasibility study sa BRT. (Elly Bolonos)   (BANATNEWS)