RTWPB modawat og petisyon

CEBU, Philippines - Ang Regional Tripartite Wages and Productivity Board (RTWPB)-7 modawat gihapon sa iduso nga petisyon sa mga mamumuo nga mangayo og dugang usbaw sa suhulan.

Kini sa dihang giuli sa RTWB ang petisyon nga giduso sa Alliance for Progressive Labor (APL) sa miaging semana kinsa nangayo og P125 across the board increase gumikan sa pagkadaghang sayop sa maong petisyon.

Ang chairman sa RTWPB ug Regional Director sa Department of Labor and Employment (DOLE)-7 Elias Cayanong mipasabot nga iyang gipakoreksyonan sa petisyoner ang ilang papel.

Gitumbok ni Cayanong nga sa 11 ka mga tawo nga nagpetisyon, 4 ra ang namirma niini.

Apan gibutyag niya nga andam nilang dawaton og balik kun iduso nila pag-usab ang maong petisyon sa usbaw sa sohulan kun wala nay sipyat.

Samtang gipadaplin lang una sa Associated Labor Union-Trade Union Congress of the Philippines (ALU-TUCP) ang ilang nag-ongong nga petisyon alang gihapon sa umento sa suweldo kay naghinangat pa ang kalag-kalag.

Apan inigliwas sa adlaw sa minatay, ihandos na usab sa grupo kining maong petisyon ngadto sa buhatan sa RTWPB.

Si Josefina Lim ang tigpamaba sa ALU-TUCP mibutyag nga bag-o lang silang nahuman sa ilang gihimo nga konsultasyon uban sa ilang mga lider gikan sa nagkalainlaing rehiyon sa nasud alang sa kantidad sa umento nga ilang pangayuon.

Matud ni Lim nga inighuman sa maong konsultasyon maklaro na nila ang unipormado nga kantidad nga ilang pangayuong   umento. Gitumbok ni Lim ang kalamidad nga miigo didto sa Luzon tungod sa bagyong Ondoy ug Pepeng malagmit maoy makalukmay sa kasingkasing sa mga negosyante sa paghatag kanila sa ilang gipangayong umento sa suhol.   (BANATNEWS)