LRT di mosaler kun Tomas way suporta

CEBU, Philippines - Si Kongresista Eduardo Gullas sa unang distrito sa probinsiya sa Sugbo nagkanayon nga ang proyekto nga Light Rail Transit (LRT) system nagkinahanglan og suporta sa local government unit (LGU) nga maglakip sa dakbayan sa Sugbo aron kini matuman.

Atol sa usa ka press conference didto sa University of the Visayas (UV) niadtong Sabado, si Gullas miingon nga ang House Bill 310 nga iyang gipangamahanan nga nagplano alang sa ipadagang LRT system dinhi sa Sugbo, dili mosalir kun dili mouyon ang mga opisyal sa local nga kagamhanang biyahian niini.

.Gibutyag niya nga ang phase I sa proyekto nga may 19 ka kilometro ang gilay-on, manukad sa dakbayan sa Talisay paingon sa dakbayan sa Mandaue agi sa dakbayan sa Sugbo. Ang phase II sa proyekto ang gikan sa dakbayan sa Talisay paingon ngadto sa lungsod sa Dalaguete ug ang phase III gikan sa dakbayan sa Mandaue paingon ngadto sa lungsod sa Sogod.

Matud pa ni Gullas nga ang kagamhanan sa dakbayan sa Talisay mipasar na og resolusyon nga nagsuporta sa maong proyekto apan nasangit kini sa dakbayan sa Sugbo kay si Mayor Tomas Osmeña dili man mosuporta niini.

Busa matud pa ni Gullas nga maglisod paglusot ang maong proyekto kay wala man kini laing agianan tali sa Talisay ug Mandaue gawas sa dakbayan sa Sugbo.

Si Johnny Ramos sa AMA Group Holdings, Corporation kinsa maoy nagsugyot sa maong proyekto nagkanayon nga dili kini ikapatuman kung barawon sa kagamhanan sa dakbayan sa Sugbo tungod kay 95 porsiyento sa mga pasahero ning LRT maggikan sa dakbayan sa Sugbo.

Si Gullas nanghinaot nga ang kagamhanan sa dakbayan sa Sugbo dili lang maglantaw sa kaayohan sa ilang lugar kundili lakip usab nga tan-awon niini mao ang kaayohan sa tanang Sugboanon. – BANAT NEWS