CEBU, Philippines - Si negosyante Efren Pelaez sa Mactan, dakbayan sa Lapulapu wala mobilib niining hingpit nang pagbinugtong nga distrito sa dakbayan sa Lapulapu.
Kini human aprobahi ni Presidente Gloria Macapagal Arroyo ang balaudnong giduso ni 6th district congresswoman Neriza Soon-Ruiz ngadto sa ubos balay balauranan nga nagsugyot sa paghimong mag-inusarang distrito sa dakbayan sa Lapulapu.
Matud pa ni Pelaez nga dako ang iyang pagtuo nga sila si Lapulapu City Mayor Arturo Boy Radaza ug Congresswoman Ruiz nakigkombuya aron pagpadali sa pagpasar sa maong balaudnon busa napirmahan dayon ni Presidente Arroyo.
Si Pelaez nagkanayon nga ang balaod nga naghimo sa dakbayan sa Lapulapu nga usa ka distrito kongresyonal tataw kaayong gitagana lang kang mayor Radaza tungod sa tinguha niini nga magkongresista sa maong distrito sa umaabot nga piniliay sa 2010.
Apan gitataw ni Pelaez nga ang ilang grupo nga mosuporta sa kandidatura ni Senador Noynoy Aquino sa pagkapresidente ug Senador Mar Roxas sa pagkabise presidente, mangita og kandidato nga ikaparang ug ikaatbang ni mayor Radaza.
Dugang pa sa maong negosyante nga disido na kaayo siyang molansar sa pagkamayor sa dakbayan sa Lapulapu aron makabaton na og tinuoray nga kalambuan ang siyudad nga gihikawan sa mga maayong mga proyekto ug serbisyo. – BANAT NEWS