Taga Maharlika nangayo'g karsada

CEBU, Philippines - Mikapin sa 30 ka mga molupyo sa sitio Maharlika, barangay Pooc, dakbayan sa Talisay ang nagpanon ngadto sa city hall sa dakbayan sa miaging adlaw kay nangayo og karsada nga ilang agianan uban sa maayong imbornal niini.

Ang maong mga molupyo didto misangko sa buhatan ni Talisay City Administrator Richel Bacaltos nga maoy naminaw sa ilang yangungo.

Usa sa maong grupo nga si Josephine Adolfo, 33-anyos, mibutyag sa   Banat News nga miduol na sila karon sa kagamhanan tungod kay ang tag-iya sa subdivision nga tag-iya sa ilang agianan karon wala man mopasalig nga mohatag kanila og karsada. 

Si Adolfo ug ang mga silingan niini mibutyag nga niadtong Mayo 2006 nagpatawag og public hearing ang developer sa maong subdivision ug didto nangayo sila og permaninteng karsada nga kaagian nila sa panahon nga adunay emerhensya sama sa sunog ug uban pang katalagman, apan matud pa wala kini mosanong sa maong yangungo.

Gani matud pa ni Adolfo nga gisugo hinoon sila sa developer nga adto papangayoa og karsada sa kasikbit nga luna sa maong subdivision. Nabalaka ang mga 3,000 ka molupyo sa maong lugar kay sa higayong sirhan na sa subdivision ang ilang agianan, wala na silay laing kaagian.

Hinuon si Bacaltos nga nakig-atubang kanila misaad nga ila kining susihon aron kahatagan og sulbad ang maong problema. (Brenda D. Batuto)   (BANATNEWS)