RTWPB nagpaabot sa mga petisyoner

CEBU, Philippines - Ang kagamhanan dili magdumili sa pagdawat sa mga petisyon bahin sa usbaw nga suweldo basta husto lamang ang pagkatagik niini ug nahitukma sa mga panukdanan nga nahilatid sa balaod. Mao kini ang gibutyag ni Regional Director Elias Cayanong sa Department of Labor and Employment (DOLE) ug sa samang higayon maoy tsirman sa Regional Tripartite Wages and Productivity Board (RTWPB) kinsa nagkanayon nga wala niya dawata ang gidusong petisyon sa mga mamumuo nga nangayo og P125 nga across the board increase tungod sa kadaghang sayop niini.

Gipasabot ni Cayanong nga ilang giuli pagbalik ngadto sa  Alliance of Progressive Labor (APL) ang maong petisyon tungod kay imbis 11 ang mopirma niini (kay onse man sila ka tawo nga nahisgutan sa maong petisyon), 4 ra ang nakapirma.

Gitambagan ni Cayanong ang mga petisyoner nga papirmahan una sa 11 ka mga tawong nagpetisyon ang ilang papeles una nila kini iduso pag-usab ngadto sa buhatan sa RTWPB. Giklaro hinoon ni Cayanong nga wala kini magpasabot nga gibasura nila ang maong petisyon kay gipaabot man nila kining mahibalik ngadto sa ilang buhatan kun makapirma na ang tanang ngalan nga anaa sa maong petisyon.

Matud pa sa tsirman sa RTWPB nga kinahanglang una mopadangat og petisyon ngadto sa RTWPB alang sa pangayuong usbaw nga suhol, kinahanglang limpyo gyud ang pagkabuhat sa petisyon, aron kini kasaligan ug katuohan nga tinud-anay gyud kining sentimento sa mga nanagpetisyon.

Midugang si Cayanong nga kun anaa na sa ilang buhatan , mao na kini kuninitan sa pagtuki sa mga miyembro sa RTWPB aron diskutihon nila ang gibug-aton sa mga katarungan nga gitumbok sa mga mamumuo itandi sa nagtakilid nga kahimtang nga ekonomiya sa nasud karong panahona.

Walay gihatag nga tagal ang RTWPB sa mga moduso og petisyon nga mangayo og umento sa suweldo kay dawaton man nila kini bisan unsang orasa basta kompleto lamang ang maong suwat. (Darrel A. Carumba)   (BANATNEWS)