Mga kriminal nagkingking na

CEBU, Philippines - Labing nagkingking karon ang mga kriminal sa sulod sa down town area sa dakbayan sa Sugbu karong nabuksan na usab ang ikaduhang Mobile Police Outpost (MPO) sa Cebu City Police Office (CCPO) diha sa mga dalan Manalili ug Magallanes ning dakbayan.

Matud pa ni Sr. Supt. Patrocinio Comendador, director sa kapulisan sa dakbayan sa Sugbu, nga gitinguha gayud nila nga tanang kanto diha sa down town area, ug sa Colon area katarokan og mga MPO aron masanta ang mga kriminal dihang lugara.

Nasuta sa kadagkoan sa kapolisan ang malampusong MPO nga gibutang diha sa may corner Colon ug Boromeo, niadtong miaging Septembre isip kaabag sa Task Force Colon.

Nakita sa CCPO nga epektibo ang pagbutang sa mga MPO tungod kay mikunhod na karon ang nagkadaiyang krimen diha sa Colon.

Matud pa ni Comendador nga   dili lang mga molupyo sa dakbayan maoy makabenepisyo niini kundili lakip na usab ang mga taga probinsya nga mosuroy ning dakbayan.

Dugang pa niya nga magtukod pa sila karong sunod buwan og dugang MPO diha sa down town area aron ilang masiguro nga dili na makahuygo ang mga kriminal sa pagpanamastamas sa mga inosenteng mga tawo nga maglakawlakaw diha sa maong lugar.

Mapasalamaton usab ang mga opisyal sa kapolisan sa mga opisyal sa barangay kinsa walay puas sa pag-abag kanila, pagbutang og mga barangay tanod uban sa mga pulis sulod sa 24 oras nga magbantay sa nahisgutang mga dapit. (Guam P. Logroño)    (BANATNEWS)