Escudero wala pay desisyon

CEBU, Philippines - Wala pay klaro kung mobutang ba og local line-up o makig-alayon ba og lokal nga partido ang Nationalist People’s Coalition (NPC) dinhi sa Sugbu sa 2010 elections.

Ang sakop sa NPC nga si Senador Francis ‘Chiz’ Escudero nipadayag nga dili pa matino kung traditional o non-traditional ba nga paagi sa pagpangampanya ang ilang sagupon.

Sa samang higayon nagdumili usab pagbutyag ang senador kung kini nangayo ba og suporta sa Bando Osmeña Pundok Kauswagan (BOPK).

Una na hinuong gipahibawo sa pangulo sa BOPK nga si Tomas Osmeña nga ang panagpares nilang Senador Benigno ‘Noynoy’ Aquino ug Mar Roxas maoy paluyuhan sa ilang grupo sa 2010.

Apan gipadayag ni Escudero nga andam siyang mosuporta sa kandidatura sa igsuon sa mayor nga si Cerge Osmeña nga nipadayag na pagpapili pagka-senador sa 2010.

Sa kasamtangan, wala pa makadesider ang senador kung modayon sa tinguha niining mosalmot sa presidential race alang sa sunod tuig nga eleksyon.

Giklaro hinuon ni Escudero nga mahibaw-an ra sa mosunod nga mga adlaw ang iyang hukom sa padayong pagtimbang-timbang sa sitwasyon.

Ang kauban sa partido ni Escudero nga si Senador Loren Legarda una nang mideklarar nga magpapili pagka-bise presidente sa 2010 elections.

Matud pa sa senador nga personal nga desisyon ang nakab-ot ni Legarda ug iyang girespeto ang iyang kauban sa partido.

Gipadayag hinuon ni Escudero nga mas taas ang kahigayunan nga siya modayon pagpapili pagka-presidente ug posibleng si Legarda maoy mamahimo niyang running-mate.

Wala matandog ang senador sa nanggawas nga mga survey nga labihang taasa ang labaw ni Aquino alang sa pagka-presidente. (Elly Bolonos)   (BANATNEWS)