Ulo sa truck boy nabangil sa trak

CEBU, Philippines - Napigsat ang ulo sa usa ka truck boy human maatrase sa trak de kargang iyang gikuyogan samtang paingon untang maghatud og mga construction materials sa bukirang bahin sa sitio Nali-ab barangay Tumalog lungsod sa Oslob niadtong Huwebes sa alas 6:00 sa gabii.

Ang biktima nga patay nang nahidangat sa tambalanan mao si Antolio Ampoon Jr, molupyo sa barangay Manlom sa samang lungsod ug maoy truck boy sa trak nga nakapatay kaniya.

Ang trak nga Isuzu Elf gipanag-iya ni Jimmy Abajon sa Pugalo, Alcoy ug gimaneho ni Juanito Perolino Posoyan, 36, molupyo sa Cagay, Poblacion sa lungsod sa Alcoy.

Matud pa ni PO1 Carmilito Dacula sa Oslob Police dihang nahinabi sa Banat News ang maong trak paingon nga maghatud og mga construction materials sa maong lugar niadtong tungura.

Apan samtang nagtungas kalit nga napawong ang makina niini hinungdan nga miambak ang duha ka truck boy kansang mga pangalan wala makuha sa kapolisan, aron unta bangilan og bato ang ligid sa trak.

Gikatahong nagpabilin lang sa ibabaw sa sakyanan ang biktima apan gumikan kay wala makapugong ang batong gibangil sa duha niya ka kauban ug padayon sa pag-atras ang trak miambak ang biktima diha sa luyong bahin.

Matud pang PO1 Dacula puno ang maong trak sa mga hollow blocks, semento ug uban pang construction supply maong padayon kini sa pag-atras padulhog ug naabtan ang biktima hinungdan nga ang ulo niini maoy nabangil sa ligid diha sa luyo hinungdan sa pagkapigsat niini.

Gisuwayan pa unta pagdala sa Oslob District Hospital ang biktima apan gideklarar kining dead on arrival. Ang drayber boluntaryong mitahan sa kapulisan apan nakagawas lang usab dayon paglabay sa usa ka adlaw human nagkasinabot ang mga kabanay sa biktima nga aregluhon ang kaso bugti sa dili na pagpasaka og kaso.   (BANATNEWS)