Ebidensya batok Ecleo lig-on

CEBU, Philippines - Ang mga abogado sa prosecution sa kasong parricide batok kang PBMA supreme master Ruben Ecleo Jr. dako og pagtuo nga lig-on kaayo ang mga ebidensya nga anaa kanila batok kang Ecleo.

Matud pa nila ni manlalaban Kit Enriquez ug Fritz Quinanola, mga abogado sa prosecution nga dili sila makatuo sa pangulipas ni manlalaban Orlando Salatandre, ang abogado ni Ecleo nga huyang ang mga ebidensya batok sa naulahi.

Matud pa ni Enriquez nga kun tinuod pang huyang ang mga ebidensya nga ilang gihuptan batok kang Ecleo, ang pangatarungan nalang unta nga wala maklaro nga iya ni Alona Bacolod ang lawas patay nga gilabay didto sa Coro, Dalaguete ang gigamit ni Salatandre nga katarungan sa pagpaluwat og piyansa kang Ecleo sa pagpagawas niini gikan sa prisohan niadtong miaging pipila ka tuig.

Apan midugang si Enriquez nga gumikan sa kalig-on sa mga ebidensya nga anaa sa ilang mga kamot karon, ang gihimong katarungan sa mga abogado ni Ecleo aron kahatagan kini og kagawasan gikan sa prisohan mao ang giingong sama na si Ecleo sa usa ka bombang talibuto nga kun dili pagawason sa prisohan adto kini moulbo o mabugtoi og kinabuhi sulod sa iyang selda. Unya midugang si Enriquez nga nakabasa pa sila og report nga misuborno kuno si Ecleo ngadto sa mga igsoon ni Alona og P4 milyones cash, house and lot sa Masbate ug educational assistance sa mga anak niini basta iatras lang nila ang kaso. Gumikan niini wala na magduhaduha sila si Enriquez ug Quinanola nga paminawon na ang mosyon sa pagpalibkas sa P1 milyon nga piyansa nga gisang-at ngadto sa sala ni Judge Soliver Peras nga paminawon kini sa huwes. – BANAT NEWS