Pamilya gibanhigan, apan way nangaangol

CEBU, Philippines - Gipaulanan og bala ang usa ka panimalay sa sitio Atbang Cabungahan, lungsod sa Naga sa miaging adlaw apan ang pamilya nga nagpuyo nasuwertehan tungod kay bisan usa walay naangol.

Ang panimalay gipuy-an sa pamilyang Albeso. Didto atol sa pangrakrak silang Guillerma Albeso, 58, ug ang anak niini nga si Carlito, iyang asawa nga si Catalina ug upat niya ka mga anak nga nagpangidaron og 12, 10, ug 6.

Nasayran nga sa wala pa mahitabo ang pangrakrak natingala si Carlito nga saba kaayo ang mga iro sa gawas sa panimalay hinungdan nga iya kining gilili sa ilang bintana. Iyang nakita ang usa ka Edwin Sayaboc nga naghapa.

Apan kalit lang mipaka ang boto-boto sa armas hinungdan nga dali niyang gipatago ang iyang anak ug asawa.

Ang kapolisan nga mi-alarma sa maong insidente nakakuha og mga kabhang sa kalibre .9mm nga 25 kabuok ug kabhang sa kalibre .45 nga tulo kabuok sa gawas nga bahin sa balay sa mga Albeso.

Ang kapolisan mipahigayon og hot pursuit operation sa grupo ni Sayaboc apan wala na silay naabtan. Giimbetar sa kapolisan ang usa ka Prudencio Abataya nga positibong giila ni Albeso nga usa sa mga kuyog ni Sayaboc atol sa insidente.

Mitug-an si Albeso sa kapolisan nga iyang pagduda naglagot kaniya si Sayaboc tungod kay gikatahong mitug-an si Albeso sa kapolisan nga si Sayaboc nagtagotago sa ilang dapit. Si Sayaboc nasayran nga usa ka wanted sa kasong pagpatay ug dugay na kining gipangita sa kapolisan.

Si Abataya kasamtangan karung natanggong sa Naga Police Station alang sa mga posibleng kaso nga ipahamtang batok kaniya.

Si Sr. Supt. Jesus Gaquing, hepe sa Cebu Provincial Police Office miingon nga padayon ang hot pursuit operation batok ni Sayaboc.

Gitan-aw karon ang report nga si Sayaboc gawas sa kasong pagpatay, gikataho nga nalambigit usab kini sa kamatayon sa usa ka mabdos human kini makigpinusilay sa kontra sa politika sa barangay Kabungahan, lungsod sa Naga. – BANAT NEWS