Away ni Sonny vs. BOPK hiloton ni Davide

CEBU, Philippines - Gipaningkamutan karon ni Konsehal Hilario Davide III, provincial chairman sa partido Liberal, nga mahilot ang kasungian tali sa Pundok Panaghiusa ni kanhi Senador John Henry ‘Sonny’ Osmeña ug Bando Osmeña Pundok Kauswagan (BOPK) ni Mayor Tomas Osmeña.

Si Osmeña nagtinguha nga mobalhin og pa-rehistro sa dakbayan sa Sugbo gikan sa dakbayan sa Toledo aron molansar pagka-mayor atbang sa BOPK human sa kasagmuyo niini nga gitudlong provincial chairman sa partido Liberal si Davide nga sakop sa BOPK nga walay konsultasyon sa ilang pundok.

Apan matud ni Davide iya nang nasultihan ang campaign manager sa LP nga si Butch Abad sa problema ug nakasabot kini sa gibati sa kanhi senador hinungdan mipasalig nga personal siyang mobisita dinhi sa Sugbo sa mosunod nga mga adlaw aron hiloton ang kasungian.

Matud ni Davide gamay lang kaayo ang maong problema nga usa lang ka ‘miscommunication.’ Gituohan niya nga dili kini maka-apekto sa kandidatura ni Sen. Noynoy Aquino ug Mar Roxas sa 2010. Gibutyag ni Davide nga sa pagkakaron sunodsunod nga pakigtigum ang gihimo gikan sa lainlaing mga political leader sa kalungsoran ug mga non-government organizations ug mga civic groups nga makatabang sa kandidatura ni Aquino ug Roxas.

Giklaro sa konsehal nga wala pa gyud sa iyang hunahuna karon ang pagpapili pagka-gobernador aron maoy moatbang kang Gobernador Gwendolyn Garcia tungod kay ang pagpakig-alayon sa tanang mga political leaders ug kahugpungan sa probinsiya ang iya karong gitutokan.

Gidugang usab ni Davide nga wala siya magbasol sa iyang pag-resign pagka-konsehal ug mitutok pagtabang nilang Aquino ug Roxas.

Alang sa konsehal gikonsiderar niya nga hagit ang mitumaw karong gamay nga kasungian sa mga Osmeña nga pulos mipadayag og suporta sa standard bearer sa partido Liberal. – BANAT NEWS