Imbestigasyon pagkatagak sa tinun-an gisugdan

CEBU, Philippines - Gisugdan na ang pag-imbestigar sa usa ka magtutudlo sa Talamban Elementary School kinsa gipasanginlan sa inahan sa usa ka grade 5 student nga wala motagad dihang natagak ang iyang anak gikan sa 3rd floor.

Si Mrs. Delinda Erana, ang assistant principal sa maong tunghaan nga gikahinabi sa Banat News nagkanayon nga kagahapong adlawa ang mga kadagkuan sa Cebu City School Division Office nipadala na og imbestigador diha sa ilang tunghaan.

Matud pa niini nga si Mr. Wilfredo Tano ang administrative officer 5 sa division office department of education maoy mipahigayon sa imbestigasyon alang sa posibleng pagpasaka’g kasong administratiba sa magtutudlo nga si Lea Leyson.

Hinuon iyang gibutyag nga kagahapon sa buntag nag-amutay silang magtutudlo og kwarta nga gihatag usab ngadto sa mga ginikanan ni Junmark Comedido nga mokabat og P3 mil   wala pay labot sa ubang nahipos nga hinabang.

Matud pa niini nga nahibaw-an nila kini pinaagi sa mga ginikanan nga nangayo’g hinabang tungod sa bayrunong P2,700 para CT Scan sa tambalanan sa bata.

Base sa ilang nadawat nga report nga maayo na karon ang kahimtang sa 12-anyos nga si Junmark.

Gibutyag ni Erana nga ang tinuoray’ng mahitabo base report nga ilang nakuha, nagduwa-duwa’g “Pogs card” si Junmark uban sa classmate nga si Edgar Bagasayo.

Gikatahong napalid ang cards ug gigukod kini ni Bagasayo paingon sa hagdanan apan ang biktima gikatahong misunod usab pinaagi sa paglingkod sa railings sa hagdanan ug nipasagirit paubos nga nagtalikod hinungdan nga kini nahagbong.

Hinuon labot sa pasangil sa inahan nga wala tagda ni Leyson human mahagbong ang bata dili siya makatubag niini tungod kay wala sila sa hitabo gumikan kay nagtambong og seminar.

Ang Banat News misuway og kuha og habig sa maong magtutudlo apan pakyas ang tinguha gumikan kay giingong si Erana ra maoy motubag sa mga pangutana bahin sa hitabo.

Mipasalig hinuon kining bukas ang ilang tunghaan sa imbestigasyon ngadto na sa ilang mga kadagkuan sa Department of Education. - Guam Logroño (BANAT NEWS)