19-anyos tipi sa leptospirosis

CEBU, Philippines - Usa ka 19-anyos nga lalaki maoy labing unang namatay sa sakit nga leptospirosis sulod sa Cebu City Medical Center (CCMC) sa dakbayan sa Sugbo niadtong Oktubre 18.

Gikonpirmar ni assistant city epidemiologist Dorenda Macasocol sa dihang nahinabi sa Banat News nga ang labing unang namatay sa leptospirosis dinhi sa dakbayan mao si Junrick Antia, 19-anyos nga taga isla sa Sta. Rosa, dakbayan sa Lapulapu.

Matud ni Macasocol nga si Antia nalandig sa CCMC niadtong Oktubre 17 sa gabii ug pagkabuntag, petsa 18 namatay kini tungod sa maong sakit.

Nunot niini, aduna pay laing upat ka kaso sa leptospirosis sa dakbayan gikan niadtong Enero ning tuiga hangtod karong bulana apan silang tanan pulos na naka-recover ug nakagawas sa tambalanan.

Matud ni Macasocol, ang katapusang pasyente nga nasakit og leptospirosis nga nalandig sa CCMC ug nakagawas niadtong petsa 10 mao ang laing batan-ong lalaki nga nagdala sa address sa Pasil apan lumad gihapon nga taga isla sa Sta. Rosa.

Nasayran nga gideklarar ang leptospirosis outbreak sa Luzon human miabot na og 130 ang namatay ug dul-an sa 2,000 ang pabiling nalandig sa tambalanan tungod sa maong sakit. Ang maong sakit gituohang nakuha gikan sa wala mahubas nga baha sa Luzon dala sa kusog nga ulan sa milabay’ng bagyong Ondoy ug Pepeng.

Giklaro hinuon ni Macasocol nga dili pa alarming ang leptospirosis dinhi sa Sugbo apan gitambagan niya ang publiko nga dili mokompiyansa ug kanunay’ng mentinahon ang limpyo nga palibot ilabi na gyud ang mga drainage nga dili magbara aron malikayan ang pagpundo sa tubig sama sa baha nga maoy tinubdan sa pagtumaw sa maong sakit.

Matud ni Macasocol ang maong sakit mugna sa bacteria gikan sa hugaw sa mga mananap sama sa baka ug mga ilaga nga mahumol sa tubig. Ang bacteria mosulod sa lawas sa tawo pinaagi sa mga samad-samad sa panit nga mahumol sa tubig nga kontaminado sa maong kagaw. – BANAT NEWS