Nadunggaban sa liog

CEBU, Philippines - Duha ka lalaki kinsa giingong parehong mga nakainom ang nagbinukbukay ug ang usa kanila nadunggaban og buak nga botelya tungod sa hamburger kagahapon sa kaadlawon sa sitio Ilang-ilang, barangay Lagtang, dakbayan sa Talisay.

Bisan og nakaangkon og mga bun-og sa lawas apan nakapabor kini kompara sa iyang kontra hinungdan nga nagtingkagol sa Talisay City detention cell si Randy Dinapol, 33, residente sa nahisgutang lugar human masikop sa gipahigayong hot pursuit operation sa grupo ni PO2 Roy Lofranco sa Talisay City Police Station. Samtang ang nakakontra ni Dinapol nga si Anthony Labajo, 22, residente usab sa maong lugar ang nalandig sa Talisay City District Hospital.

Si Lofranco nga nahinabi sa Banat News kagahapon mibutyag nga si Dinapol mipalit og unom ka hamburger ug ang lima niini giapod-apod ngadto sa iyang mga higala.

Kalit lang nga mitunga si Labajo ug nangayo og hamburger ug tungod kay kuwang man nakigtunga na lang si Dinapol kang Labajo sa iyang hamburger apan giingong gikasuko kini ni Labajo ug misangpot kini ngadto sa lalis.

Giingong kalit gisukmag ni Labajo ang baba ni Dinapol ug wala pa matagbaw gikulata pa gyud ni Labajo si Dinapol, si Dinapol nakapunit og basiyong botelya gidukdok kang Labajo apan naigo kini ngadto sa traysikol hinungdan nga kini nabuak apan sa kapungot gidayon niini og duslak si Labajo sa liog.

Ang duha naglinayugay hangtud nga naulang sa mga tawo ug gidala sa tambalanan ang samaron.  -  BANAT NEWS