2 nakuryentihan

CEBU, Philippines - Duha ang patay, usa niini tanod dihang nakuryentihan samtang nagtaud og linya alang sa pagsuga sa palibot sa ilang barangay hall nunot sa nagsingabot nga kapistahan sa bukirang bahin sa barangay Mangga lungsod sa Alcantara niadtong Miyerkules sa alas 5:00 sa hapon.

Ang mga biktima mao si Helario Ejalon, molupyo ra sa maong lugar ug Aurelio Hernandez, tanod sa maong barangay.

Matud pa ni PO2 Herbert Lamosao sa Alcantara Police dihang nahinabi sa Banat News ang mga biktima nagtaud og wirings kay butangan og suga ang palibot sa barangay hall tungod usab sa kasaulogan sa ilang piyesta karung adlawa.

Apan samtang paingon na untang i-tap ni Ejalon ang tumoy nga linya sa wire sa main safety breaker wala kini makabantay nga basa ang iyang mga kamot tungod sa pagsige og uwan maong kini nakuryentihan.

Dihang nabantayan ni Hernandez nga nakirig na si Ejalon nga natapot sa wire sa kuryente iyaha kining gidali og tabang   apan naapil kini sa nakuryentihan ilabina kay pulos nagtiniil ug wala magsul-ob og tsinelas ang mga biktima.

Si Hernandez patay diha-diha samtang si Ejalon gidali paghatud sa Badian District Hospital apan gideklarar nga dead on arrival. – BANAT NEWS