Karsadang napahak wa tagda

CEBU, Philippines - Gikabalak-an sa mga molupyo sa sitio Litmon, barangay Dumlog, dakbayan sa Talisay nga may madisgrasyang kinabuhi sa ilang lugar gawas kun ayuhon kining ilang karsada nga napahak na og katunga nalay nahibilin kay gikabra sa dagkong bawod sa dagat.

Si Mary Ann Abellana, 49, nga taga Litmon, mibutyag sa Banat News kagahapon nga kung mahulpa ang laing katunga sa karsada gawas nga dili na kaagian og sakyanan, peligro kaayo sa mga bata nga magduwaduwa sa maong lugar ug mahagbong sa lawom kaayong bahin sa maong dalan.

Matud pa ni Abellana nga wala pa siya makakita nga may taga barangay o kaha taga City hall nga misugod na og ayo sa maong karsada.

Gani inig hapak sa dagkong bawod, ang tubig sa dagat mosulbong sa taas ug adto motugpa sa dapit sa balay ni Artemio Mabanag nga nahimutang sa daplin sa maong karsada.

Ang ubang mga molupyo sa lugar kinsa nawagtangan na og mga balay kay gilampurnas sa mga higanteng bawod, namakwit na.

Ang uban tua na sa relocation site nga gihatag kanila sa gobyerno samtang ang uban namalhin sa laing dapit.

Apan naa pa gyuy nagpabilin hangtod karon kay ang ilang panginabuhing panagat dili kabiyaan.

Gawas sa problema sa karsada naa pay kinubkobay sa bas sa baybayon nga maoy labing naghatag og hulga sa maong lugar kay wala nay mosagang sa dagkong mga bawod nga anha mohagsa sa maong dapit.  – BANAT NEWS