CEBU, Philippines - Karon pa lang, nakapanglantaw na si Mayor Tomas Osmeña og landslide victory dinhi sa Sugbo sa panagpares nilang Senador Benigno Simeon ‘Noynoy’ Aquino III ug Manuel ‘Mar’ Roxas II sa 2010 nga eleksiyon.
Si Osmeña nagkanayon nga dayag ang kadaogan ni Aquino ug Roxas tungod sa pagpaluyo sa mga iladong lider sa politika sa Sugbo ngadto sa standard bearer sa partido Liberal. Subay niini, ang mayor mimando na nilang Konsehal Nestor Archival ug Gerardo Carillo nga motabang og kampanya sa duha ka senador ngadto sa amihanan ug habagatang distrito sa siyudad sa Sugbo. Si Archival sa amihanan ug si Carillo sa habagatan.
Ang duha ka konsehal anaa na sa ikatulo ug katapusang termino ug dili na mahimong makapasubli sa katungdanan.
Dugang niini, gipahibalo ni Osmeña nga si Konsehal Hilario Davide III nga taga Argao maoy gitahasan sa mayor nga motabang og kampanya sa mga kandidato sa Liberal sa mga lungsod sa probinsiya human itudlo nga provincial chairman sa Sugbo sa naasoy’ng partido.
Kahinumdoman nga ang Bando Osmeña Pundok Kauswagan (BOPK) nga gipanguluhan sa mayor sa siyudad opisyal na nga mipahibalo nga mosuporta sa tandem nilang Aquino ug Roxas pagka-presidente ug bise-presidente sa 2010 nga eleksiyon.
Sa miaging gabii, nagtagbo ang mga sakop sa BOPK sa usa ka kan-anan ug nagkasabot silang tanan sa pagsuporta kang Aquino ug Roxas. Kini nasukwahi sa unang baruganan ni Osmeña sa dihang si Roxas nga hugot niyang gisuportahan tungod sa pagdala sa senador sa ‘business outsourcing’ sa nasud sama sa mga call centers nga nakahatag og daghang trabaho sa mga Sugboanon, mipahibalo nga dili na modagan pagka-kongresista aron iduso si Aquino. Si Osmeña mipahibalo nga dili siya mosuporta ni Aquino.
Apan human sa konsultasyon sa mga sakop sa BOPK ug sa mga kapitan sa siyudad ug nakigtagbo ni Aquino, nausab ang hunahuna niini.
Gawas sa BOPK, mosuporta usab kang Aquino ug Roxas silang kanhi Senador John Henry ‘Sonny’ Osmeña.
Si Kongresista Antonio Cuenco posible usab nga mosuporta sa tandem nilang Aquino ug Roxas tungod sa iyang relasyon sa pamilyang Aquino, apan sa ulahi niyang pahibalo nga si Senador Manuel Villar ang iyang suportahan. – BANAT NEWS