Pan Bisaya giapod-apod sa Olango

CEBU, Philippines - Ang “Pan Bisaya” giapod-apod sa kabalayan sa kabarangayan sa isla sa Olango sa dakbayan sa Lapulapu sanglit mao kini ang sulbad sa gutom nga kabataan nga nahimong problema sa kagamhanan sa nangaging katuigan.

Si Dr. Rodulfo Berame nga maoy city health officer sa maong dakbayan sa iyang pamahayag atol sa programa sa kabataan karong tuiga iyang gipasabot nga ang Pan Bisaya nga ilang giapod-apod sa kabataan sa maong lugar dili lang makatambal sa gibating kagutom.

Matud pa niya nga puno sa bitamina ang Pan Bisaya nga ilang gipakaon sa kabataan ug makadugang kini sa ilang kahimsog sa panglawas alang sa pagsulbad sa suliran sa malnourish nga kabataan.

Gipasabot ni Dr. Berame nga ilang giapod-apod sa pagpakaon sa kabataan ang puno sa vitamina nga naglakip sa Vitamin A, Iron ug uban pang makahatag og dugang kahimsog sa atong panglawas.

Dugang pa niya nga mokabat sa P1 milyon nga kantidad ang gigahin ni Mayor  Arturo Radaza nga maoy ilang gigamit alang sa pagpatuman sa mga programa sa kahimsog sa kabataan.

Gipasabot niya nga naglakip sa gihimo nilang programa sa kabataan sa isla sa Olango mao ang pagpasiugda og milk feeding program ug uban pang puno sa sustansiya nga pagkaon.

 Si Mrs. Paz Radaza nga maoy chairman sa committee on women and children protection program maoy nag-una sa mga opisyal sa kagamhanan nga mitambong sa programa nga gipahigayon sa covered court sa Gun-ob sa maong dakbayan. - Romeo T. Limpangog (BANAT NEWS)