CEBU, Philippines - Duha ka managhigala ang samdan human kini pusila sa giingong miyembro sa Crips gang didto sa sitio White Road,barangay Inayawan ning dakbayan sa Sugbo kagahapon pasado alas 12:00 sa tungang gabii.
Ang mga biktima nailhan nga sila si Jaypee Aresgado, 20; ug Jojo Maglinte, hingkod , nga pulos taga White Road.
Nasayran nga ang mga biktima nagbaklay uban sa ilang mga higalang babaye nga ginganlan lang nga Carin ug Joy dihang kalit lang silang giduol sa usa ka giingong miyembro sa Crips gang.
Matud pa, gipangutana niini ang mga babaye ngano kunong miapil sila sa grupo nga Bloods ug tungod kay wala kini tagda sa mga babaye, nasuko ug namusil ug ang mga biktima maoy nasabak sa bala.
Si Aresgado samdan sa walang bahin sa iyang bukton, samtang si Maglinte nasabak sa iyang tiyan ug gihatod dayon sila sa Cebu City Medical Center.
Samtang ang namusil kanila dali kaayong nakasibat. Matud pa ni SPO1 Jay Yballe sa Homicide Section sa Cebu City Police Office nga nasuko ang kriminal ngadto sa duha ka babayeng kauban sa mga biktima kay wala kini magpasakop sa Crips. - Lesley Caminade (BANAT NEWS)