Davide kwalipikado sa pagka-gobernador

CEBU, Philippines - Si Provincial Election Supervisor Atty. Lionel Marco Castillano nagkanayon kagahapon nga si Cebu City Councilor Helario Jun Davide III kwalipikadong modagan sa pagkagobernador sa lalawigan sa Sugbu atbang kang Gobernador Gwendolyn Garcia sa piniliay sa sunod tuig.

Sigun sa report sa DyRF, si Castillano miingong wala siya’y nakitang babag sa pagdagan ni Davide sa labing taas nga posisyon sa probinsiya bisan pa man og napili kining numero unong konsehal sa siyudad sa Sugbu sa duha na ka termino.

Matud pa ni Castillano nga dili na usab mahimong isyu ang pagkakonsehal niini sa siyudad tungod kay mo-resign na kini sa iyang katungdanan sa Oktubre 30 ug mangampanya pa sa kandidatura ni Senador Noynoy Aquino sa pagkapresidente sa nasud.

Si Castillano nagkanayon nga ang gikinahanglan lamang ni Davide nga makahatag kini og kamatuoran nga nakapuyo siya sa iyang yutang natawhan nga mao ang lungsod sa Argao sulod sa unom ka bulan sa dili pa ang election ug nakabalhin sa iyang rehistrasyon sa probinsya aron masiguro nga wala na kini suliran nga atubangon kun makadisisyon kining mokandidato sa pagkagobernador.

Hinuon giklaro ni Castillano nga ang iyang buhatan dili makabalibad sa pagdawat sa reklamo unya ilabina og kasong disqualification, apan mag-agad lamang sa gibug-aton sa ebidensiya ang ila unyang disisyon. - Chester Abadilla (BANAT NEWS)