CEBU, Philippines - Gikondinar sa militanting pundok sa Sugbo ang pagsikop sa militar sa tulo ka mga Sugboanong batan-on didto sa Zamboangita ,Negros Oriental ug gitumbok nga mga sakop sa rebelding NPA.
Gibutyag ni Dennis Abarientos sa Karapatan Central Visayas sa Banat News nga kataw-anan matud niya ang gihimo sa militar nga unta nasuhito man kini sa balaod nga mideretso lang og pasangil nga sakop sa walhong pundok ang mga nadakpan nilang mga batan-on.
Giklaro ni Abarientos nga dili korte ang mga sakop sa Central Command (CENTCOM) nga maoy mohusga nga mga sakop sa rebeldi ang ilang nadakpan.
Matud ni Abarientos nga naanad na ang militar nga kanunay’ng mopasangil nga mga sakop sa rebelding NPA kutob sa mga tawo nga ilang makontrahan.
Gihimong sanglitanan niya ang dili muminos 13 na ka mga kaso nga gipasaka sa Centcom batok sa ilang mga kaubanan sa Karapatan nga gipasanginlan og mga kasong multiple murder ug kidnapping apan kining tanan pulos gibasura sa korte.
Ang mga nadakpan nga sila si Maria Carla Alvarico alyas Janet Macarasig, nursing graduate nga taga siyudad sa Mandaue, Carlo Hernandez Cabahug, computer graduate nga taga Maguikay, Mandaue ug Absin Glenn Filamer, political Science graduate sa University of Cebu.
Didto sila masikop sa usa ka checkpoint sa militar sa sitio Pulang Yuta barangay Mayabon, Zamboangita, Negros Oriental niadtong Domingo sa alas 7:00 sa gabii human nasakmitan sila og kalibre .38 nga revolver ug mga subersibong dokumento. - Darrel A. Carumba (BANAT NEWS)