CEBU, Philippines - Mosang-at og mosyon ang Cebu Transport and Allied Services Multipurpose Cooperative sa Land Transportation Franchising and Regulatory Board nga padesisyunan na ang ilang petisyon nga pagpasaka sa pletihan nga ilang gi-file duha na ka bulan ang nakalabay.
Ang tsirman sa CITRASCO nga si Ryan Benjamin Yu mitug-an sa The Freeman nga mopasaka sila og mosyon karong semanaha tungod sa nagpadayong pagsaka sa presyo sa krudo nga P2 matag litro. Si LTFRB regional director Romulo Bernardes nagkanayon nga ilaha nang nahatud sa ilang ulohang buhatan ang position papers sa nagpetisyon ug kadtong nisupak niini nga maoy basehan sa desisyon.
Ang CITRASCO misang-at sa petisyon niadtong Agusto 18, 2009 nga nangayo og P1 nga umento sa minimum nga pletihan gikan sa P6.50 ngadto na sa P7.50.
Mireklamo ang mga nagpetisyon nga gawas sa nagsakang presyo sa lana mimahal usab ang ubang produktong gamitunon kaayo sa operasyon sa mga sakyanan sama sa oil, lubricant, ligid, ug piyesa. - BANAT NEWS