2 tinun-an, nurse sikop sa encounter

CEBU, Philippines - Duha ka mga Sugbuanong estudyante nadakpan sa militar human sa engkwentro niini sa mga gidudahang mga rebeldeng New Peoples Army (NPA) niadtong alas 7:45 sa Domingo sa gabii sa sitio Pulang Yuta sa barangay Mayabon, Samboangita, Negros Oriental.

Usa ka sundalo ang naangol sa maong hitabo nga giilang si Pfc. Angelo Mones sakop sa 79th Infantry Battalion nga nagbase sa maong lugar.

Ang nangadakpan giilang sila si Maria Carla Alvarico, 22, usa ka lisensyadong nurse gikan sa Cebu Velez College nga may alyas nga “Janeth Makarasig” nga giingong chairman sa College Editors Guild of the Philippines (CEGP) taga Plaridel Street barangay Alang-Alang dakbayan sa Mandaue; Carlo Hernadez Cabahug, 22, nga usa ka Associate Computer Technology sa University of San Carlos (USC) taga barangay Maguikay dakbayan sa Mandaue ug giingong team leader sa Organizing Committee sa underground movement sa “Kabataang Makabayan.”

Kauban nila si Absin Glenn Filamer, 22, alyas “Brian,” tinun-an sa kursong Political Science sa University of Cebu ug sakop sa League of Filipino Student (LFS) nga taga Plaridel Guihulngan, Negros Oriental.

Si Sr. Supt. Agusto Marquez, director sa Negros Provincial Police Office sa pakighinabi sa Banat News mibutyag nga napasakaan na og kasong rebellion, attempted murder ug illegal possession of firearms niadtong Lunes ang tulo.

Wala hinuon mahinayon ang inquest proceedings sa tulo sanglit mi-invoke sila sa preliminary investigation sa ilang kaso ug mi-file og waiver of detention.

Si Marquez nagkanayon nga dunay usa ka patay'ng lawas nga nakit-an duol sa gihitaboan nga gituuhang kauban sa grupong mirakrak sa mga sundalo.

“Kining mga estudyantiha nikuyog sa mga NPA sa bukid, kay mao man ni daw kay mag ‘on the job training’ (OJT) while naa sila didto nakaengkwentro sa Army,” matud pang Marquez ug midugang nga sagad kini buhaton sa mga tinun-an panahon sa semestral break ug tingbakasyon.

Ang militar ug kapolisan mipasangil nga ang maong mga organisasyong mang-recruit og mga estudyante alang sa NPA sagad magpakaaron-ingnong dunay himuong medical mission, OJTs ug uban pa sa kabukiran apan diay mokuyog sa armadong kalihukan.

Ang Hunta Probinsyal sa Negros Oriental mipalabang na og resolusyon nga gidili na ang pagpahigayon og medical missions sa kabukiran kun walay permiso sa gobernador.

Ang grupo nadakpan sa checkpoint combat patrol team sa 79th Infantry Battalion pinanguluhan ni 1Lt.Ramon Salvador sa nahisgutang lugar dihang girakrakan sa grupong gikuyogan sa mga estudyante.

Gikatahong nakadawat og report ang militar kabahin sa mga rebeldeng moagi sa maong dapit maong ila kining gihimoan og checkpoint.

 Ang lead scout nga si Pfc. Angelo Mones giingong mipara sa duha ka mga habal-habal nga adunay mga nagsakay nga pasahero apan imbes mohunong gipusil hinuon sa usa sa mga pasaherong armado og .45 kalibreng pistola si Mones diha sa tiyan ug tuong tudlo.

Ang mga sundalo daling mibawos og pabuto ngadto sa mga nagmotor nga gidudahan nilang mga rebelde apan nag-iyahay og pasirit ang mga suspek apan ang tulo nangambak sa motor ug nangluklok sa kimba.

Sa gipahigayong follow-up operation sa military si Lt. Col. Oscar Lasangue sa 3rd Civil Relations Office sa Central Command miingon nga nakuha sa dapit nahitaboan ang usa ka .38 revolver, tulo ka back packs nga nagkadugo, mga sinina, subersibong dokumento, paper bag nga adunay mga communist teachings, first aid kit ug usa ka nylon rope.

Si Lasangue nagtuong mga miyembro ang mga estudyante sa NPA.

“The alleged captured NPA members came from Cebu City to help the armed movement and organizing works,” matud pa ni Lasangue.

Matud pang Lasangue nga si Alvarico maoy mihulip sa pwesto sa napatay nga si Rachel Mae Palang, nga usa ka nurse ug tinun-an sa Cebu Velez College nga taga Consolacion ug opisyal gihapon sa CEGP nga napatay usab sa militar sa usa sa mga gisulong nilang kampo sa NPA sa Negros sa milabay'ng tuig. – BANAT NEWS