Ouano nanghatag og bugas

CEBU, Philippines - Si kanhi Mayor Thadeo Ouano sa dakbayan sa Mandaue nanghatag og mga bugas ug mga linata nga pagkaon nga naglakip sa mga sardines ug corned beef, ug uban pa ngadto sa mga biktima sa sunog sa sitio Mangga sa barangay Opao, dakbayan sa Mandaue sa miaging adlaw.

Kini bisan wala na siya sa katungdanan apan sa gihapon nagpadayon sa iyang katilingbanong pangalagad alang sa Mandauehanon.

Si Ouano didto manghatag sa maong hinabang sulod sa covered court sa barangay Opao nga maoy nahimong temporaryong gipuy-an sa kagatusan ka pamilya nga nabiktima sa sunog sa sitio Mangga sa maong barangay sa miaging semana.

Wala makontento sa pagpabaha og hinabang didto sa covered court ,mibisita gayud si Ouano sa dapit nga nasunogan ug didto nanghatag gihapon sa pipila ka mga biktima nga nagbarong-barong lamang nga maoy temporaryo nilang gipuy-an.

Si kanhi Mayor Ouano nga nahinabi sa Banat News miingon nga dili lalim ang kaguol nga gibati sa mga biktima sa sunog nga sulod lang sa usa ka pamilok nahanaw ang ilang panimalay lakip na ang ilang hinagoang mga butang sulod sa dugay nga katuigan.  - Romeo T. Limpangog (BANAT NEWS)