CEBU, Philippines - Mikaping P200 mil ang kantidad sa mga butang nga nadala sa duha ka tulisan gikan sa usa ka Koreano nga ilang gitulis didto sa Brgy. Subangdako, dakbayan sa Mandaue sa milabay’ng gabii.
Ang biktima mao si Lee Tsang Shook, 28, ulitawo, usa ka Korean national nga temporaryong nagpuyo sa Nikki Garden Hotel sa Brgy. Subangdako, dakbayan sa Mandaue.
Matud pa ni PO3 Nersas Baay ,sa Station 2 sa Mandaue City Police Station, nga si Lee naglakaw sa maong dapit nga nagsalig-ay sa iyang traveling bag paingon na unta sa hotel.
Dihang kalit lang siyang gihunongan sa usa ka motorsiklo nga gisakyan sa duha ka wala hiilhing tawo ug kalit lang gisakmit ang iyang bag.
Gumikan sa kahadlok ni Lee , nga patyon siya, gitugyan nalang niya ang maong bag ug wala na siya moreklamo .
Matud pa ni Lee nga ang sulod sa iyang bag mao ang iyang mga mahalong mga biste, laptop, camera, relo , electronic dictionary ug gibanabana ang tanan nga mokapin sa P200 mil. Bisan pakyas ang kapolisan sa pag-ila sa mga suspetsado apan ilang suwayan ang biktima sa pagpakita og mga hulagway sa mga bangiitang tulisan sa ilang gallery pamasin nga aduna kini hiilhan sa mitulis kaniya. - Bong Soriano (BANAT NEWS)