1 patay 3 angol sa Liloan

CEBU, Philippines - Usa ang patay ug tulo ang angol apil na ang suspek dihang nagpinusilay ang duha ka grupo sa mga batan-on nga sakop sa magkaribal nga gang sa Bagong Daan sa barangay Yati lungsod sa Liloan niadtong Domingo sa alas 4:00 sa kaadlawon.

Ang biktimang patay na paghidangat sa tambalanan mao si Louie Quinaging, 18, taga sitio Libo, barangay Tayud, Liloan ug samaron ang duha ka kauban niining 17-anyos nga nagpuyo sa susamang lugar ug Lyndon Abucay, 19, nagpuyo sa barangay Jugan, Consolacion ug pulos giingong mga sakop sa Bloods gang.

Samtang naangol sab ang usa sa gipasanginlang suspek ang 17-anyos nga nagpuyo diha sa gihitaboan nga giingong sakop sab sa karibal nga Crips Gang.

Matud pa ni SPO1 Claudio Castro Jr. sa Liloan Police dihang nahinabi sa Banat News sakay ang mga biktima sa motorsiklo paingon sa nahitaboan ug dihang naabot sa maong lugar kalit silang gipamusil sa grupo sa suspek.

Apan usa sa mga biktima nakabawos og bunot og armas ug mipusil sa suspek sa walang paa ug karon nalandig sa usa ka pribadong tambalanan dinhi sa dakbayan sa Sugbo.

Samtang ang mga biktima gidali pagdala sa tambalanan apan dead on arrival si Quinaging.

 Ang 17-anyos nga kauban ni Quinaging nakaangkon og samad pinusilan ubos nga bahin sa walang dughan samtang si Abucay nakaangkon og samad pinusilan sa tuong bahin sa lawas ug padayon pang giatiman sa mga doktor. (BANATNEWS)