CEBU, Philippines - Grabeng naangol ang usa ka tigulang lalaki human kini mabiktima sa pagpamusil sa iyang silingan alas 8 pasado ang takna sa miaging gabii sa sitio Soong, barangay Mactan, dakbayan sa Lapulapu.
Ang biktima mao si Demetrio Igot, 70 anyos, minyo ug ang nagpusil mao si Ruel Penote, 32 anyos, minyo ug pulos nagpuyo sa maong dapit. Si SPO3 Rex Ybañez sa homicide section sa kapolisan sa maong dakbayan miingon nga nakigkukabildo ang biktima sa mga anak niini sa gawas sa panimalay niini. Ang suspetsado kinsa kalit lang mitumaw nga nagdala og armas ang kalit lang mipusil sa biktima nga maoy hinungdan sa naangkong samad pinusilan sa pus-on niini.
Dali nga gidala ang biktima sa Mactan Doctors Hospital sa barangay Basak sa maong dakbayan apan human sa pasiunang pagtambal dali usab kining gibalhin sa pribadong tambalanan sa dakbayan sa Sugbo. Si SPO3 Ybanez miingon nga ang suspetsado nga nadakpan sa follow up nga gihimo nila ni SPO1 Ronie Acar ug mga kauban ang gibalhog na karon sa bilanggoan. (RTL) (BANATNEWS)