CEBU, Philippines - Usa ka bata ang naangol dihang girakrakan sa armadong lalaki ang usa ka panimalay sa sitio Ylaya barangay Bolinawan lungsod sa Carcar niadtong Domingo sa alas 5:00 sa sayo nga kabuntagon.
Matud pa ni PO1 Rowena Santillan sa Carcar Police dihang nahinabi sa Banat News ang nanag-iya sa pinuy-anan nga si Joel Remolado, 43, midangop sa ilang buhatan ug nisumbong sa nahitabong pagpangrakrak.
Atol sa pagsukit-sukit si Remolado mitug-an nga samtang diha sila sulod sa balay ug bag-o pang nangmata kalit lang girapido sa wala nila mailhing tawo ang ilang panimalay.
Usa sa iyang mga anak nga menor de edad nga si Gerald Remolado naigo niini.
Si Remolado ni-turn over sa kapulisan sa usa ka deformed slugs sa 9mm nga armas nga gituohang gikan sa armas nga gigamit sa nangrakrak.
Nakaangkon og daghang buslot buslot sa bungbong ang panimalay ni Remolado agi sa mga bala nga miigo sa maong panimalay apan walay natumbok nga suspek si Remolado nga posibleng responsable sa pagpamusil kanila sanglit wala siya’y kontra sa ilang lugar.
Ang kapulisan padayon pa sa ilang imbestigasyon pagtumbok sa suspek ug sa motibo sa maong pagpangrakrak sa pinuy-anan sa pamilyang Remolado. (Darrel Carumba) (BANATNEWS)