P4.6 milyones ang danyos sa 4 ka sunog sa dakbayan

CEBU, Philippines - Mokabat sa P4.6 milyones ang kinatibuk-ang danyos sa nahitabong upat ka sunog sa dakbayan sa Sugbu kagahapon ug adlaw’ng Domingo, labing dako niini mao ang sa Florencio Urot Memorial National High School sa barangay Mabolo. Ang alarma sa sunog diha sa maong tunghaan nadawat alas 8:40 sa gabii ug nakontrolar kini human sa 25 minutos apan naabot pa sa 3rd alarm matud pa ni Cebu City Fire Marshal Ismael Codilla.

Napulo ka lawak saringan ang naugdaw nga giingong nagsugod diha sa karaang kantina nga gihimong classroom ug gibana-banang P3.3 milyones ang danyos. Wala pa matino ang hinungdan sa pag-ulbo sa kalayo.

Samtang sayo nianang adlaw’ng Domingo, usa ka 2-storey nga balay ang naugdaw diha sa Maria Cristina St. sa barangay Camputhaw nga midanyos og P1.2 milyones.

Ang balay nga naugdaw iya ni Blesy Nemeno ug partially damaged sad ang balay ni Myrna Luspo. Giingong sa ikaduhang andana sa balay ni Nemeno nagsugod ang kalayo pasado alas 4 sa kaadlawon apan gisusi pa ang hinungdan niini.

Alas-5 pasado kagahapon, gibana-banang mokabat sa P100 mil ang danyos sa naugdaw nga bodega ni Maria Socorro Enriquez diha sa Ma. Luisa Village sa barangay Banilad, giingong electrical misuse ang nakita sa imbestigador nga si SFO1 Nilo Daculan ang hinungdan niini.

Nianang hapon sa adlaw’ng Domingo, nasunog ang usa ka lawak sa 4th floor sa Cebu Business Hotel sa dalan Colon nga giokupar sa usa ka Lebanese nga si Summer Saab dihang ang aircon nabiyaang nag-andar. Gibana-banang P20,000 ang danyos niini.   (Lesley Caminade)   (BANATNEWS)