Environmentalists mokiha sa Naga officials

CEBU, Philippines -  Nagplano ang mga environmentalists nga supak sa katukoran sa Korean Electric Power Corporation pagpasaka og kaso batok sa mga lokal nga opisyal sa dakbayan sa Naga tungod sa wala nila pagsupak sa katukoran sa maong planta nga ilang gihulagway nga makadugang og problema karon sa global warming ug peligro sa panglawas sa mga residente.

Si Atty. Gloria Ramos sa Global Legal Action on Climate Change (GLACC-Cebu) sa press conference kagahapon nagkanayon nga giandam na nila karon ang kasong kriminal ug administratiba batok sa maong mga opisyal.

“Wa nasakit? Kay wa pay assessment,” matud pang Vince Cinches, ang secretary general sa Fisherfolk Development Center (Fidec).

Matud pa sa grupo nga ang mga sample palang daan sa mga coal ash nga nakuha sa Department of Environment and Natural Resources sa Naga nga gipailalom sa laboratory test nagpakita nang dunay presensya sa “heavy metals” apan gipakagamay lang kini sa pag-ingon wala kini maabot sa ‘hazardous level.’

Matud pa ni Cinches nga ang survey nagpakita nang daan nga walay ‘transparency’ ug nanawagan ang grupo og independenteng eksperto nga maoy mohimo sa laboratory test ug survey. Gihulagway ni Ramos nga ang coal ash di angayang itambak sa mga baybayon kay kini angayang ilubong sa lugar nga di maabot sa tubig.

Ang grupo mialegar nga tungod sa presensya sa coal-fired Salcon Power plant sa Naga duna nay mga residenteng nangasakit, si Cinches nagkanayon nga bisan ang mga tubig ilimnon di na luwas imnon tungod sa mga “heavy metals” ug mihagit sa mga opisyal sa Naga nga moinom sa maong mga tubig. 

Apan bisan paman niini, ang konseho sa Naga mipasar og resolusyon nga nagpadayag sa ilang hugot nga suporta sa katukoran sa 200-megawatt coal power plant nga proyekto sa Korean Electric Power Corporation diha sa ilang lungsod.

Ang konseho nagkanayon nga walay natala gikan sa ilang City Health Office, mga barangay health centers nga nangasakit nga mga tawo sama sa sakit sa panit nga giingong mugna sa polusyon tungod sa gipangtambak nga coal ash.

Sumala pa sa konseho nga ang katukoran sa maong planta naghatag na og sa trabaho sa mga Nagahanon ingon man ang kalamboan unyang makab-ot sa ilang dapit inig katapos na sa maong mga planta.  (Uban sa report ni Liv Campo)   (BANATNEWS)