CEBU, Philippines - Nabuslot ang ulo sa usa ka lalaking gipusil diha sa kilid sa merkado publiko sa barangay Cansaga sa lungsod sa Consolacion pasado alas 3 sa kaadlawon sa milabay'ng adlaw.
Ang namatay giilang si Junby Torimocha, taga barangay Nangka sa nahisgotang lungsod.
Si PO1 Ritchie Gapo, imbestigador sa kapolisan sa maong lungsod nga nahinabi sa Banat News miingon nga kuyog sa biktima ang iyang mga barkada nga nag-inom sa maong dapit dihang kalit nga mitumaw ang wala hiilhing lalaki nga nagdalag armas.
Ang mga biktima ug mga higala nagkatibulaag pagpanagan pahilayo sa maong dapit apan giingong gigukod sa maong tawo ang biktima ug dihang naapsan gipusil kini duha ka higayon.
Gisusi sa kapolisan ang anggulong posibleng kaaway sa biktima ang maong tawo ug ingon man ang anggulong posibleng karibal nga laing grupo ang suspek sanglit nabaniog na sa dapit ang presensya sa nagkadaiyang nagkabanging fraternities ug gang. – BANAT NEWS